1 қыркүйек - МЕКТЕПАЛДЫ ДАЯРЛЫҚТЫ ҰЙЫМДАСТЫРУ

Балаларды мектепте оқуға дайындау бойынша жұмыс мектепалды жастағы балалардың жас және жеке ерекшеліктері ескеріліп, жүйелі  жүргізілуі тиіс.

Тәрбиеленушілердің денсаулығын нығайтуға, негізгі физикалық қасиеттерін дамытуға, ұсақ және жалпы моториканы жетілдіруге, мәдени-гигиеналық дағдылар мен салауатты өмір салты негіздерін қалыптастыруға назар аудару ұсынылады.

Мектепке дайындаудың маңызды құрамдас бөлігі таным процестерін: зейін, есте сақтау, ойлау, қабылдау, қиял мен сөйлеуді дамыту болып табылады. Балалардың бақылау, салыстыру, талқылау, қарапайым себеп-салдарлық байланыстар орнату, өз ойын жеткізу, әңгімелесуге қатысу, мәтіндерді қайталап айту және әңгіме құрастыру дағдыларын қалыптастыру қажет. Сөздік қорды байыту мен байланыстырып сөйлеуді дамытуға ерекше мән беру қажет.

Сауат ашу мен математика негіздерін қалыптастыруды практикалық әрекеттерді, көрнекі құралдар мен дидактикалық ойындарды қолданып, ойын түрінде өткізуге болады. Балаларда дыбыстар туралы түсініктерді қалыптастыру, фонематикалық естуді дамыту, кеңістік пен уақытты бағдарлау, санау, заттарды шамасы, пішіні мен саны бойынша салыстыру қабілетін дамыту қажет, сондай-ақ, мектеп бағдарламасының қайталануына және шамадан тыс оқу жүктемесіне жол берілмеуі тиіс.